Bərdə Rayon Polis Şöbəsinin əməkdaşları tərəfindən rayon ərazisində narkotik vasitələrin qanunsuz dövriyyəsi və belə əməllərlə məşğul olanların aşkar edilməsi istiqamətində daha bir əməliyyat tədbiri keçirilib. Nəticədə dövriyyədən külli miqdarda narkotik vasitə çıxarılıb.

APA TV-nin Qarabağ bürosunun məlumatına görə, RPŞ əməkdaşlarının keçirdikləri əməliyyat-axtarış tədbirləri nəticəsində şəhər sakini Seyfəddin Kazımov şübhəli şəxs qismində saxlanılıb. Onun üzərindən polietilen bağlamada narkotik vasitə olan heroin aşkarlanaraq götürülüb.

Əməliyyat tədbirlərini davam etdirən polis əməkdaşları narkotik vasitəni S.Kazımova satmaqda şübhəli bilinən şəhər sakini İqdam Salmanovu da saxlayıb. İ.Salmanovun yaşadığı evə baxış zamanı orada gizlətdiyi çəkisi 477.277 qram marixuana və 8.897 qram heroin aşkarlanıb.

Faktla bağlı cinayət işi başlanılıb, araşdırmalar davam etdirilir.