Fransa prezidenti Emmanuel Makronun Qüdsün İsrail paytaxtı kimi tanınmasına dair ABŞ-ın qərarını pisləməsi Tel-Əvivdə narazılıq doğurub.

 

APA TV-nin xəbərinə görə, Parisdə prezident Makronla görüşdən sonra mətbuata açıqlama verən İsrailin baş naziri Benyamin Netanyahu bildirib ki, Qüds 3000 ildən artıqdır İsrailin paytaxtıdır:  “Siz bu barədə Bibliyada və digər dini kitablarda oxuya bilərsiniz. İsrailin paytaxtı Qüdsdən başqa hara ola bilər?”

 

Netanyahu həmçinin bütün dünya dövlətlərini, o cümlədən ərəb ölkələrini Qüdsü İsrailin paytaxtı kimi tanımağa çağırıb. O bildirib ki, Qüdsün paytaxt kimi tanınması bölgədə sülhüm əsas təminatçısı ola bilər.

 

Fransa prezidenti Emmanuel Makron İsrail baş naziri ilə görüşdən sonra bəyan edib ki, ölkəsi ABŞ-ın Qüdsü paytaxt kimi tanımağa dair birtərəfli qərarını təqdir etmir. O əlavə edib ki, bu qərar beynəlxalq hüquq normalarına ziddir və bütün dünyada təhlükəsizlik üçün ciddi təhdid formalaşdırır.

 

Bundan əvvəl Avropa İttifaqı və BMT baş katibi də analoji bəyanatla çıxış etmişdi.