Yanvarın 6-da axşam Çin sahillərində Honkonqa məxsus yük gəmisi ilə toqquşan İrana məxsus neft tankerinin partlayaraq batması təhlükəsi var.

 

APA TV-nin "Euronews"a verdiyi məlumata görə, SANCHI adlı tankerdə yanğın davam edir.

 

Tankerin korpusu və sızan yanacaq alovla əhatə olunub. Partlayış təhlükəsi üzündən, eləcə də yanan məhlul havaya yüksək səviyyədə toksik maddə buraxdığı üçün yanğınsöndürənlər gəmiyə yaxınlaşa bilmir. Çinin dənizdə təhlükəsizlik üzrə dövlət idarəsi qəza yerindən 10 mil məsafədə gəmilərin hərəkətini qadağan edib.

Gəminin göyərtəsində 32 nəfər heyət üzvü var imiş. Onlar itkin düşmüş hesab olunurlar.

Qeyd edək ki, hadisənin baş verdiyi ərazidən bir qədər aralıda ekipaj üzvlərindən birinə aid olduğu ehtimal edilən cəsəd aşkarlanıb.