"ABŞ-ın Suriyanın şimalında 30 minlik ordu qurması bölgədə gərginliyi artıracaq və yeni müharibəyə gətirib çıxaracaq".

APA TV-nin Türkiyə mətbuatına istinadən məlumatına görə, bu açıqlama İran prezidenti Həsən Ruhaniyə məxsusdur.

ABŞ-ın sözü gedən planının Suriyada aparılan antiterror əməliyyatları ilə yaxından-uzaqdan əlaqəsi olmadığını deyən Ruhani bunu beynəlxalq hüquqa, o cümlədən bir ölkənin suverenliyinə qarşı təcavüz kimi qiymətləndirib.

Xatırladaq ki, bir müddət əvvəl ABŞ-ın Suriyada PYD/YPG ordusu formalaşdırmaq, Suriyanın şimalındakı ərazidə terror təşkilatının hakimiyyəti ilə rəsmən diplomatik əlaqə yaratmaq niyyətində olması barədə məlumatlar yayılıb. ABŞ Suriya və İraqda İŞİD-ə qarşı mübarizə məqsədilə qurulan koalisiyanın PKK-nın Suriya qolu PYD/YPG-nin təşkil edəcəyi 30 minlik ordudan ibarət olacağını bəyan edib.

Həsən Ruhanidən öncə Türkiyə prezidenti Rəcəb Tayyib Ərdoğan da həmin ordunun qurulmasına imkan verməyəcəklərini vurğulayıb.