Gecə saatlarında Bakının Qaradağ rayonu ərazisində qadını avtomobil vurub. APA TV-nin məlumatına görə, avtoqəza Müşfiqabad qəsəbəsində baş verib.

Qəsəbə sakini Nazilə Nəsirova yolu keçmək istəyən zaman taksi kimi fəaliyyət göstərən minik avtomobilinin zərbəsi ilə üzləşib. Xəsarət alan qadın təcili tibbi yardım maşını ilə 1 saylı Xəstəxanaya çatdırılıb və həkim nəzarətinə verilib.

Bakının Nərimanov rayonunda da piyadanı avtomobil vurub. Hadisə Həsən Əliyev küçəsində, Azərbaycan Müəllimlər İnstitutunun qarşısında baş verib.

1985-ci il təvəllüdlü Muradov Ruslan Vidadi oğlu yolu keçmək istəyən zaman avtomobilin zərbəsinə tuş gəlib. Piyada aldığı xəsarətlərlə 1 saylı Xəstəxanaya yerləşdirilib. Hazırda vəziyyəti orta ağırdır.

Hər iki yol qəzası ilə bağlı araşdırmalar aparılır.