Son bir ay ərzində Şamaxı rayonuna yağan qar və yağışdan sonra yenidən aktivləşən torpaq sürüşməsi nəticəsində Quşçu kəndindəki evlərdə irili-xırdalı çatlar əmələ gəlib.

 

APA TV-nin yerli bürosunun xəbərinə görə, kənddə torpaq sürüşməsi hər gün davam edir və dağdan axıb gələn torpaq kütləsi evlərə doğru hərəkət edir. Bu günlərdə 8 hektar torpaq sahəsi sürüşməyə məruz qalıb, böyük yarğanlar və çökmələr əmələ gəlib, yeraltı qrunt suları üzə çıxıb.

 

Sürüşmə qısa vaxtda pay torpaqlarındakı əkin sahələri ilə yanaşı, həyətyanı əraziləri və tikililəri də öz cənginə alıb. Sürüşmə sahəsinin eni 1500 metr, uzunluğu 180 metrdir. Yarğanların dərinliyi 2 metrə çatır. Sürüşmə zamanı həyətyanı sahələrin hasarları, meyvə ağacları və əkin sahələri torpağın altında qalıb, evlərə və yardımçı tikililərə ziyan dəyib. Son günlər Quşçu kəndində 10 evin divarında iri çatlar əmələ gəlib. Həmçinin 300 evi içməli su ilə təmin edən bulağın da torpaq altında qalma təhlükəsi  yaranıb. Bulağa aparan avtomobil yolu torpaq sürüşməsi nəticəsində bağlanıb.

 

Ekologiya və Təbii Sərvətlər Nazirliyinin, Şamaxı rayon İcra Hakimiyyətinin nümayəndələri sürüşmə zonasına baxış keçiriblər, sakinlərlə görüşüblər. Mütəxəssislər sürüşmə sahəsində monitorinq aparıblar.

 

Şamaxı rayon İcra Hakimiyyətindən APA TV-nin yerli bürosuna verilən məlumata görə, indiyədək rayon mərkəzində, eləcə də 7 kənddə baş verən torpaq sürüşməsi zamanı 400-dən çox evə ziyan dəyib.

 

Qeyd edək ki, torpaq sürüşməsi Şamaxı şəhərində, eləcə də rayonun Çabanı, Mədrəsə, Meysəri, Birinci Çaylı, Muğanlı, Acıdərə və Qaleybuğurd kəndlərdə daha çox müşahidə olunur.