Son günlər Cəlilabad rayonunda sürüşmə zonaları aktivləşib. APA TV-nin cənub bürosunun verdiyi xəbərə görə, Cəlilabad-Yardımlı avtomobil yolundakı sürüşmə zonaları son yağıntılardan sonra aktivləşməyə başlayıb.

Yolun Kövüzbulaq və Pərdi kəndləri arasındakı hissəsində müxtəlif yerlərdə iri çatlar əmələ gəlib. Yağıntıların təsirindən asfalt qatı tədricən sıradan çıxıb.

"Yol dağılıb gedir. Elə bil təməli yoxdur yolun. Elə  vaxt olur biz maşınla gəlib burada yolda qalırıq. Bir traktor gətirib maşını çəkdiririk", - rayon sakini Mayıl Bədəlov belə deyir.

Sürücülər bunun daha da təhlükəli ola biləcəyindən narahatdır. Buradakı yol yatağının eroziyaya uğraması istənilən vaxt sürüşmənin baş verməsinə şərait yaradır:

"Çoxu qalır, keçə bilmir yollardan. Maşınlarını xarab edirlər, qalırlar yollarda".

Kənd sakinləri deyirlər ki, çökmənin yaranmasına gətirib çıxaran digər səbəblərdən biri ərazidən mütəmadi yük avtomobillərinin də keçməsidir. Sözügedən yolun Xanəgah kəndində isə təpəlik ərazidə olan torpaq layları yola doğru axın edib.

Qeyd edək ki, Cəlilabad-Yardımlı avtomobil yolu dağlıq və təpəlik ərazilərdən keçdiyi üçün aktiv sürüşmə sahəsində yerləşir. Hər il payız-qış mövsümündə ərazidəki sürüşmə zonaları aktivləşir.