Göyçay rayonunda xırda buynuzlu heyvanlar yırtıcıların hücumuna məruz qalıb. APA TV-nin yerli bürosunun xəbərinə görə, hadisə bu gün rayonun Yekəxana kəndində qeydə alınıb.

 

Canavarlar kəndin kənarındakı qoyun sürüsünə soxularaq sakinlərə məxsus 10 baş qoyunu parçalayıb. Tələf olan heyvanlar dezinfeksiya edilərək torpağa basdırılıb. Xəsarət alan qoyunlara isə baytar həkimlər tərəfindən tibbi yardım göstərilib.

 

Kənd sakinlərinin sözlərinə görə, qış aylarında canavar və çaqqallar tez-tez fərdi təsərrüfatlara hücum edərək, iri və xırdabuynuzlu heyvanları, ev quşlarını tələf edir.