Dağlıq Qarabağ münaqişəsinin nizamlanması üzrə danışıqlarda irəliləyişə nail olmaq üçün tərəflər, 2011-ci il tarixli Kazan sammitindəki razılaşmalara əsaslanaraq, biri-birinə inamsızlıqdan imtina etməlidir. 

 

APA TV-nin Rusiya mətbuatına istinadən məlumatına görə, bunu Rusiyanın xarici işlər naziri Sergey Lavrov bildirib.

 

O deyib ki, həmin ideyalar "kağızda öz əksini" tapmalıdır: "Ən əsası hələ də danışıqlarda müşahidə olunan inamsızlıqdan imtina etmək və fikri kifayət qədər çox olan real, praqmatik ideyalar üzərində cəmləşdirmək gərəkdir".

 

Onun sözlərinə görə,  2011-ci il tarixli Kazan sammitinə xüsusilə də Minsk qrupu həmsədrləri tərəfindən hazırlıq işləri çox intensiv aparılmışdı: "Lakin artıq sammit vaxtı əlavə sual və şərhlər yarandı. Belə olur. Biz bundan faciə etmirik. İş davam etdiriləcək. Əminəm ki, "Kazan sənədi"ndə yer almış müddəaların əksəriyyəti bu gün də aktualdır".