Astarada 15 ədəd partlamamış top mərmisi tapılıb.

 

APA TV-nin cənub bürosunun məlumatına görə, mərmilər şəhərin Həzi Aslanov küçəsində qazma işləri aparılarkən sakinlər tərəfindən aşkar olunub. Bu barədə dərhal DİN-in "102 zəng mərkəzi"nə məlumat verilib.

 

Əraziyə ANAMA-nın xüsusi əməliyyat qrupu cəlb olunub. Baxış keçirilən zaman həmin yerdən tapılan sursatın 10 ədəd 82 mm-lik BK-881, 2 ədəd 107 mm-lik BK 883, 1 ədəd 82 mm-lik O-832 və 2 ədəd 73 mm-lik BK markalı top mərmiləri olduğu məlum olub.

 

ANAMA-nın əməkdaşı Böyükağa Haqverdiyevin sözlərinə görə, xüsusi mobil əməliyyat qrupu əraziyə gələrək baxış keçirib, 800 kv. m yerüstü, 30 kv. m yeraltı təmizləmə aparıb, cəmi 15 sursat aşkar edilib. Bunlardan 10 ədəd 82 mm-lik BK-881, 2 ədəd 107 mm-lik BK 883, 1 ədəd 82 mm-lik O-832 və 2 ədəd 73 mm-lik BK top mərmisi aşkar olunub. Ərazi tam olaraq yoxlanılıb, ərazidə əlavə heç bir partlayıcı və partlayıcı maddə aşkar olunmayıb.

 

Partlamamış top mərmiləri ərazidən götürülərək zərərsizləşdirilmək üçün Bakı şəhərinə aparılıb.