Cəlilabadda toya gedən ailənin evi qarət olunub. APA TV-nin cənub bürosunun verdiyi xəbərə görə, hadisə rayonun Cavad Xan küçəsində törədilib.

Məlumata görə, oğrular evə girən zaman ev sahibi Gülpaşa Ağayev ailə üzvləri ilə birgə yaxınlarının toy məclisində iştirak edib. Onların evdə olmamasını fürsət bilən şəxs və ya şəxslər pəncərəni sındıraraq mənzilə daxil olub.

Geri qayıdan zaman ev əşyalarının dağıdıldığını görən G.Ağayevin dediyinə görə, oradan qızıl-zinət əşyaları, pul, kompüter və bir də oyun diskləri aparılıb. Ümumilikdə dəymiş ziyanın məbləği isə 5000 manat dəyərində təxmin edilir.

Faktla əlaqədar polisə də məlumat verilib. Hazırda əməliyyat-axtarış işləri aparılır.