«Heydər Əliyev və Azərbaycan Sərhəd Mühafizəsi» mövzusunda elmi-praktiki konfrans keçirilib
Dövlət Sərhəd Xidmətinin Aparatında «Heydər Əliyev və Azərbaycan Sərhəd Mühafizəsi» mövzularında elmi-praktiki konfrans keçirilib.
APA TV-nin xəbərinə görə, tədbirdən əvvəl Dövlət Sərhəd Xidməti Aparatının hərbi qulluqçuları Heydər Əliyev Elmi Araşdırmalar Mərkəzində ulu öndərin həyat və fəaliyyətini əks etdirən zəngin foto-ekspozisiya ilə tanış olub və Heydər Əliyevin büstünün önünə gül dəstələri qoyublar.
Dövlət himninin səslənməsi ilə başlanan rəsmi hissədə Heydər Əliyevin Azərbaycan xalqı və dövləti qarşısında misilsiz xidmətlərindən söz açılıb.
Konfransda deputat Aydın Mirzəzadənin “Heydər Əliyev şəxsiyyəti Azərbaycan dövlətçiliyinin parlaq simvoludur” mövzusunda məruzəsi dinlənilib.
Konfrans iştirakçılarına Azərbaycan Sərhəd Mühafizəsinin inkişafına Ulu Öndər Heydər Əliyevin ali diqqət və qayğısını əks etdirən «Heydər Əliyev və Azərbaycan Sərhəd Mühafizəsi» mövzusu şərh edilib və ulu öndərin sərhədçilərlə görüşləri zamanı sərhəd təhlükəsizliyinin gücləndirilməsinə dair tapşırıq və tövsiyələri interaktiv təqdimat formasında nümayiş etdirilib.
Tədbirdə ulu öndərin həyat və fəaliyyətinə həsr olunmuş sənədli film nümayiş etdirilib.
