Ermənistan prezidenti Armen Sarkisyan baş nazir Nikol Paşinyanın təklifi ilə polis və Milli Təhlükəsizlik Xidmətinə (MTX) yeni rəhbərlər təyin edib.

APA TV xəbər verir ki, A.Sarkisyanın fərmanına əsasən, Ermənistan polisinin rəisi vəzifəsinə İrəvan polis rəisinin sabiq müavini Valeri Osipyan, MTX direktoru postuna isə xidmətin paytaxt üzrə idarəsinin rəis müavini Artur Vanesyan təyin edilib.

Nikol Paşinyan “Facebook”-da dərc etdiyi video müraciətində bildirib ki, MTX-nin yeni rəhbəri əsas diqqətini gömrük sistemindəki nöqsanların aradan qaldırılmasına yönəltməlidir.

Onun sözlərinə  görə, güc strukturlarındakı korrupsiya ilə mübarizə çox sürətlə aparılmalıdır. O qeyd edib ki, bu məsələ MTX və polis rəhbərlərinin əsas vəzifələrindən biri olmalıdır.

Qeyd edək ki, Ermənistanda polis və MTX rəhbərləri birbaşa baş nazirə tabedir.