Neft həftənin ilk seanslarında dəyər itirib.

 

APA TV-nin məlumatına görə, qiymətlərin ucuzlaşmasının müxtəlif səbəbləri var.

Birləşmiş Ərəb Əmirliklərinin (BƏƏ) enerji naziri Suhail Əl Mazroueyi ABŞ-ın İrana yeni sanksiyaları tətbiq edəcəyi halda OPEC-in bazarda yarana biləcək boşluğu dolduracaq gücdə olduğunu açıqlayıb.

O, kartel üzvü olan Səudiyyə Ərəbistanı, Küveyt və BƏƏ-nin bununla əlaqədar üzərinə düşəcək vəzifələri yerinə yetirəcəyini deyib.

 

Ucuzlaşmaya digər səbəb ABŞ-da fəal neft quyularının sayının artmasıdır. Qaya nefti çıxarılan quyuların sayı 2015-ci ilin martından bu yana ən yüksək səviyyəyə çatıb.

 

Qiymətlərin 70 dolların üzərində olmasına səbəblər isə ABŞ-ın İranla imzalanmış nüvə razılaşmasından çıxması, bu ölkəyə qarşı sanksiyaların sərtləşdirilməsi, Yaxın Şərqdə gərginliyin daha da artmasıdır. Bazarın diqqəti qeyd olunan problemlərin fonunda OPEC-in istehsalın azaldılması razılaşmasının vaxtını uzadıb-uzatmayacağına yönəlib.

 

Hazırda birjalarda "Brent" markalı neft 76,72 dollardan, Qərbi Texas nefti isə 70,47 dollardan satılır.