Zərdabda özünü jurnalist kimi təqdim edərək vətəndaşları şantaj edən şəxs tutulub.

 

APA TV-nin yerli bürosunun məlumatına görə, Zərdab rayon sakinləri - Mürsəliyev Faiq  Əsgər oğlu, Fətəliyev Bəxtiyar Beydulla oğlu, Məmmədov Sadiq Arif oğlu və Qurbanov Anar Şirvan oğlu Zərdab Rayon Polis Şöbəsinə ərizə ilə müraciət edərək, rayon sakini Məmmədov Qənimət Tehran oğlunun barələrində sosial şəbəkələrdə rüsvayedici məlumatlar yaymaq hədəsi ilə onlardan pul tələb etdiyini bildirmişlər.

 

Polis əməkdaşlarının keçirdiyi əməliyyat-axtarış tədbirləri nəticəsində özünü müxbir kimi qələmə verən Q.Məmmədov tutularaq istintaqa təhvil verilib. İlkin araşdırma zamanı məlum olub ki, Q.Məmmədov Ucar rayon ərazisində də sahibkarlıq fəaliyyəti ilə məşğul olan rayon sakinləri - İsgəndərov Elvin Əlikiram oğlunu, İbrahimli Rəhim Aktiv oğlunu və İbrahimov Müşfiq Səmid oğlunu sosial şəbəkələrdə rüsvay edəcəyi ilə hədələyərək onlardan müxtəlif məbləğdə pul tələb edib.

 

Faktla bağlı araşdırma aparılır.