Qurban Yetirmişli: "Güclü təkanlar gözlənilmir"
"Hiss olunan zəlzələlər baş verə bilər. Amma güclü, dağıdıcı zəlzələ baş verə bilməz”.
APA TV-nin xəbərinə görə, bunu Zaqatalada səfərdə olan AMEA nəzdində Respublika Seysmoloji Xidməti Mərkəzinin baş direktoru Qurban Yetirmişli deyib.
Hazırda hiss olunmayan təkanların baş verdiyini bildirən Q.Yetirmişli qeyd edib ki, fövqəladə hallar naziri, general-polkovnik Kəmaləddin Heydərovla birgə zəlzələnin episentrinə yaxın yaşayış məntəqələrində olub: “Baxış zamanı elə də güclü dağıntılara rast gəlmədik. Sadəcə, köhnə tikililərdə mövcud çatlar genişlənib. Bəzi yerlərdə isə keyfiyyətsiz materiallardan inşa edilmiş hasarlar uçub. Ümumilikdə 2012-ci ildə baş vermiş zəlzələ ilə indiki zəlzələ arasında çox böyük fərq var. O vaxt çox ciddi dağıntılar olmuşdu. Dünən baş vermiş zəlzələ zamanı isə dağıntı və ölüm faktı qeydə alınmayıb. Zəlzələnin maqnitudası 5,5 olub. Proses davam edir, indiyə kimi 100-ə yaxın afterşok qeydə alınıb”.
Mütəxəssis qeyd edib ki, episentri Zaqatalada olan zəlzələdən sonra ərazidə 90-a yaxın afterşok qeydə alınıb. Amma ərazidə dünən baş verən zəlzələ kimi güclü təkanlar gözlənilmir: “Ola bilər ki, əhalinin hiss edəcəyi xırda təkanlar qeydə alınsın”.