Koreya Xalq Demokratik Respublikasının (KXDR) lideri Kim Çen In və ABŞ prezidenti Donald Tramp arasında Sinqapurda keçirilən görüşün yekunlarına dair sənəd imzalanıb.

 

APA TV-nin CNN-ə istinadən məlumatına görə, D.Tramp imzalanmadan sonra bildirib ki, bu, hərtərəfli əməkdaşlığa dair sənəddir: "Biz Koreya yarımadasının nüvəsizləşdirilməsinə doğru sürətlə addımlayırıq. Dünya və Şimali Koreya arasında münasibətlər bu sənədin imzalanmasından sonra tam dəyişəcək. Biz dünya üçün çox böyük və çox təhlükəli problemin həllinə çalışacağıq. Biz böyük dilemmanın öhdəsindən gələcəyik".

 

Şimali Koreya liderini Ağ Evə dəvət edən D.Tramp bu gün Sinqapurda baş verənlərdən qürur duyduqlarını dilə gətirib. O, Kim Çen Inla bundan sonra da görüşlər keçirəcəyini bildirib.

  

KXDR lideri isə dünyanın mühüm dəyişikliklərin şahidi olacağını deyib: "Çətin olsa da, ABŞ-la əməkdaşlıqda maraqlıyıq".