Əfqanıstanın Qəndahar vilayətində terrorçular polislərə hücum edib. APA TV-nin məlumatına görə, onlar “Taliban” terror qruplaşmasının silahlıları olub.

 

Toqquşma barədə məlumat verən vilayət başçısının mətbuat katibi Davud Əhmədinin sözlərinə görə, həmin silahlıların Qəndaharın şimal-şərqində polisin Nəzarət-Buraxılış Məntəqəsinə hücumu nəticəsində 25 terrorçu məhv edilib.

 

"Eyni zamanda, silahlı toqquşmada 6 polis əməkdaşı ölüb, daha 10 nəfəri yaralanıb. Vilayətin cənub-şərqində də oxşar hücum olub və bu toqquşmada isə 9 polis öldürülüb, 5-i yaralanıb", - D.Əhmədi belə deyib.

 

Digər bir məlumata görə, “Taliban” qruplaşmasının silahlıları 4 Nəzarət-Buraxılış Məntəqəsini ələ keçirib.