"Azərbaycanda Qarabağ müharibəsi əlillərinə əlillik statusunun verilməsi ilə bağlı mövcud meyarlara ciddi dəyişikliklər ediləcək. Bu, həmin şəxslərə qoyulan tibbi diaqnozdan asılı olacaq".

APA TV-nin xəbərinə görə, əmək və əhalinin sosial müdafiəsi nazirinin müavini Natiq Məmmədov bildirib ki, 1990-cı illərdə Azərbaycanda bəzi xəstəliklərin müalicəsi yox idisə, bu gün ölkədə müxtəlif əməliyyatlar aparılır. Bu səbəbdən də əlillik statusunun verilməsi ilə bağlı standartlara ciddi dəyişikliklər olunacaq. Eyni zamanda, əlillərin tibbi-sosial ekspert komissiyalarının əsasnaməsinə də dəyişikliklər ediləcək: «Çünki həmin sənəd 1997-ci ildə qəbul olunub. Bu əsasnamə qəbul olunarkən Azərbaycan əhalisi təxminən 8 mln.-a yaxın idi, hazırda isə 9,3 mln.-a yaxındır. Ona görə də həkimlərin iş yükünü nəzərə alaraq, hər bir zona komissiyası 70 min nəfərə xidmət edirdisə, artıq bu rəqəm 200-250 min nəfərə yaxındır».

Nazir müavini deyib ki, ilkin tibbi-sosial ekspertiza müayinələrinin araşdırılması işləri başa çatıb. Yoxlamalar zamanı respublika üzrə 16 850 nəfərin ilkin əllilik sənədlərindən 3 653 nəfərinin sənədləri yoxlanılıb və təsdiq edilib: «11 729 nəfərin ilkin əlillik sənədləri həmin şəxslərin əyani müayinəsi aparılmaqla yoxlanılıb. Əyani müayinəsi aparılmış şəxslərin 6,4%-i barədə əlavə müayinə təyin olunub. Qalan 9,3% tam reabilitasiya, 8,2% hissəvi reabilitasiya olunub. Əyani müayinəyə dəvət olunmuş şəxslərin 11,1%-ı müayinəyə gəlməyib».

 

Nazir müavini qeyd edib ki, tibbi-sosial ekspertiza müayinələrinə dair arayışlar da elektron formada veriləcək.