Tovuz rayon sakini minaya düşüb. APA TV-nin qərb bürosunun məlumatına görə, rayon mərkəzindən 55 kilometr aralı, Ermənistanla sərhəddə yerləşən Qaralar kəndinin sakini, 1974-cü il təvəllüdlü Hidayət Müseyibov ayaq nahiyəsindən aldığı müxtəlif xəsarətlərlə Tovuz Mərkəzi rayon Xəstəxanasına yerləşdirilib. Hidayət Müseyibov sərhəddə piyada əleyhinə mina partlaması zamanı xəsarət aldığını deyib.

 

Xəstəxanada onun sağ ayağının baş barmağı amputasiya edilib. Məlumata görə, yaralı şəxs bildirib ki, yer buz bağladığı üçün piyada əleyhinə olan minanın təsir gücü zəif olub. Məhz bu səbəbdən də 40 yaşlı Hidayət Müseybov hadisədən az xəsarət alıb.