N.Tusi adına Şamaxı Astrofizika Rəsədxanasında “Təbiətlə bağlı fundamental problemlərə müxtəlif elmlər qovşağından müasir baxışlar” mövzusunda respublika seminarı keçirilib. APA TV-nin məlumatına görə, AMEA-nın Yer Elmləri və Fizika-Riyaziyyat və Texnika Elmləri bölmələrinin birgə təşkilatçılığı ilə keçirilən seminarda AMEA Riyaziyyat və Mexanika İnstitutunun professoru Misir Mərdanov, AMEA-nın müxbir üzvü, Geologiya İnstitutunun Tektonofizika və Geomexanika Şöbəsinin müdiri Hətəm Quliyev, AMEA-nın Respublika Seysmoloji Xidmət Mərkəzinin baş direktoru Qurban Yetirmişli, AMEA-nın Şamaxı Astrofizika Rəsədxanasının direktoru, AMEA-nın müxbir üzvü Əyyub Quliyev məruzə ilə çıxış ediblər. Müxtəlif sahələrdə çalışan alimlərin fikir və təkliflərinin öyrənilməsi, səylərinin birləşdirilməsi məqsədilə keçirilən tədbirdə Yer daxilində gedən proseslər, zəlzələ ocaqları, vulkanlar, onların yaranma səbəbləri, bu sahədə aparılan tədqiqatlar, zəlzələ ölçmə cihazlarının funksiyaları, kosmosda gedən proseslər, Yer planetinə komet, asteroid və meteroit təhlükəsi barədə müzakirələr aparılıb. Tədbirdən sonra Respublika Seysmoloji Xidmət Mərkəzinin baş direktoru Qurban Yetirmişli ötən il Azərbaycanda baş verən zəlzələlər haqqında məlumat verib. Qurban Yetirmişli bildirib ki, 2013-cü ildə Azərbaycanda 24 hiss olunan zəlzələ baş verib ki, onlardan 6-sı Şamaxıda baş verib. Ölkədə 35 seysmoloji stansiya mövcuddur. Zəlzələ ocaqları yerin 18-20 kilometr dərinliyində baş verib. Demək olar ki, hər gün yeraltı təkanlar olur. Təkcə ötən ilin dekabrında 100-dən çox kiçik yeraltı təkan olub.  Qurban Yetirmişlinin sözlərinə görə, zəlzələlər Qobustandakı vulkanların tədricən oyanmasına səbəb olur. Şamaxının Muğanlı qəsəbəsində torpaq sürüşmələrinin aktivləşməsinə də bölgədəki yeraltı təkanların çox böyük təsiri var.