Ukrayna prezidenti Viktor Yanukoviç gözlənilməz addım atıb. O, müxalifət liderlərinə vəzifə vəd edib. APA TV-nin məlumatına görə, Viktor Yanukoviç , "Batkivşina" fraksiyasının lideri Arseni Yatsenyuka baş nazir, "UDAR" partiyasının lideri Vitali Kliçkoya isə baş nazirin hümanitar məsələlər üzrə müavini vəzifəsini təklif edib. Prezident bildirib ki, müxalifət liderləri təklifi qəbul etsələr, hökumət buraxılacaq. Viktor Yanukoviç hesab edir ki, müxalifətlə birgə fəaliyyət ölkənin birləşməsinə, dövlət və cəmiyyət üçün vacib islahatların həyata keçirilməsinə kömək edəcək. Viktor Yanukoviç son etiraz aksiyalarında həbs edilənlərin azad edilməsi tələbi ilə də razılaşıb. Prezidentlə görüşdən sonra "UDAR"partiyasının lideri Vitali Kliçko tərəfdarlarına bildirib ki, Viktor Yanukoviç müxalifətin bir çox təklifləri ilə razılaşsa da, bu il növbədənkənar prezident seçkilərinin keçirilməsi ilə bağlı razılaşma əldə olunmayıb. Bununla belə, Vitali Kliçko deyib ki, bu məsələ ətrafında danışıqlar davam etdirələcək. Baş nazir vəzifəsi təklif edilən Arseni Yatsenyuk isə bəyan edib ki, müxalifət hökumətə rəhbərlik etməyə hazırdır. SİTAT: "Biz ölkənin taleyinə görə məsuliyyətdən qorxmuruq. Bu məsuliyyəti qəbul edirik və ölkəni Avropa Birliyinə aparmağa hazırıq". SİTATIN SONU. Arseni Yatsenyuk bildirib ki, müxalifətin başqa bir təklifi Ukraynanın 2004-cü il Kosntitusiyasına qayıtmasıdır. Bundan başqa, Ali Radanın yanvarın 16-da qəbul etdiyi qalmaqallı qanunların ləğvi də gözlənilir. Bu məsələ yanvarın 28-də parlamentin növbədənkənar iclasında müzakirə edilməlidir.