Bərdənin Lək kəndində elektrik transformatorunun partlaması nəticəsində güclü yanğın baş verib. Transformatora birləşən yüksəkgərginlikli elektrik xətləri qırılaraq kənd sakinlərindən birinin həyətyanı sahəsinə düşüb.

Bu da alovun sürətlə yayılmasına səbəb olub. Sakinlər yanğını söndürməyə çalışsalar da, havanın nisbətən küləkli olması alovu daha da gücləndirib.

Fövqəladə Hallar Nazirliyi Bərdə Dövlət Yanğın Mühafizə Hissəsinin yanğınsöndürənləri əraziyə cəlb olunduqdan sonra alovu söndürmək mümkün olub. Hadisə zamanı xəsarət alan olmayıb. Amma partlayış zamanı bir necə evdə elektriklə işləyən məişət avadanlıqları sıradan çıxıb.

Hadisəyə transformatordakı qısaqapanmanın səbəb olduğu ehtimal olunur.