Krımda gərgin vəziyyət davam edir. Simferopol aeroportunda bütün reyslər təxirə salınıb. Bunun səbəbi açıqlanmasa da, Krımın hava məkanının şənbə günü axşam saatlarına kimi bağlı olacağı bildirilir.

BMT Təhlükəsizlik Şurasının üzvləri Ukraynanın suverenliyi, birliyi və ərazi bütövlüyünü dəstəkləyiblər. Təhlükəsizlik Şurasına sədrlik edən Litvanın BMT-dəki daimi nümayəndəsi Raymond Murmokayte bildirib ki, Ukraynaya dəstək qərarı qurumun fövqəladə toplantısında qəbul olunub. Qapalı keçirilən toplantıda BMT baş katibinin siyasi məsələlər üzrə köməkçisi Oskar Fernandes-Taranko Ukraynadakı vəziyyət barədə məlumat verib. Təhlükəsizlik Şurasının üzvləri Ukraynada bütün siyasi oyunçuları təmkin nümayiş etdirməyə və siyasi dialoqa çağırıblar.