Rusiya Federasiya Şurası Ukrayna ərazisinə qoşun yeridilməsinə razılıq verib. APA TV-nin Rusiya mətbuatına istinadən verdiyi məlumata görə, bu haqda Federasiya Şurasının iclasında qərar qəbul edilib. Bu arada Rusiya hərbçiləri ilə dolu yük avtomobillərinin Ukraynanın Zaporojye vilayəti ilə irəlilədiyi məlum olub. Maşın karvanının Çonqar yarımadasından keçdiyi bildirilib. Kiyevdə mərkəzi hakimiyyət bundan xəbərdar olsa da, hələlik heç bir addım atılmır. Qeyd edək ki, Ukrayna müdafiə naziri İqor Tenyux ölkəsinin Rusiyaya xəbərdarlığına baxmayaraq, Krıma 6 min əsgər və hərbi texnika göndərildiyini söyləyib. Hal-hazırda Rusiyanın Ukraynadakı hərbi bazalarında 20 min əsgəri var.