"Biz ümid edirik ki, Azərbaycan və Ermənistan prezidentləri bu ay görüşəcəklər. Yalnız onlar sülh prosesi ilə bağlı ən çətin məsələləri həll edə bilərlər".

APA TV-nin xəbərinə görə, bu sözləri ATƏT-in Minsk Qrupunun amerikalı həmsədri Ceyms Uorlik şəxsi "twitter" səhifəsində yazıb. O həmçinin Azərbaycan xarici işlər naziri Elmar Məmmədyarovla münaqişənin danışıqlar yolu ilə həll olunması və digər vacib məsələlərlə bağlı məhsuldar müzakirələrin aparıldığını qeyd edib.

Azərbaycanın xarici işlər naziri Elmar Məmmədyarov ATƏT-in Minsk qrupunun həmsədrləri ilə Parisdə görüş keçirib.

Görüşdə Fransa, Rusiya və ABŞ-dan olan həmsədrlər Jak For, İqor Popov və Ceyms Uorlik, həmçinin ATƏT-in fəaliyyətdə olan sədrinin xüsusi nümayəndəsi Anjey Kaspşik iştirak ediblər.

Paris görüşündə münaqişənin nizamlanması ətrafında danışıqlar prosesində mövcud vəziyyət müzakirə edilib.

ATƏT-in Minsk qrupunun həmsədrləri martın 11-də Moskvada Ermənistanın xarici işlər naziri Edvard Nalbandyan ilə görüşəcəklər.