Ötən il sığınacaqda yerləşdirilən insan alveri qurbanlarının himayəsində olan 23 azyaşlı məktəbdənkənar təhsil və peşə proqramlarına istiqamətləndirilib. APA TV-nin xəbərinə görə, bu barədə məlumat  “İnsan alverinə qarşı mübarizə üzrə milli koordinatorun illik məlumatı haqqında” sənəddə yer alıb. Sənəddə qeyd olunur ki, baxımsız qalan və risk qrupuna aid olan 52 nəfərə şəxsiyyət vəsiqəsi və doğum haqqında şəhadətnamə alınmasında köməklik göstərilib. Daxili İşlər Nazirliyinin İnsan Alverinə qarşı Mübarizə Baş İdarəsinin nəzdində uşaqlar üçün lazımi avadanlıqlarla təmin edilən sığınacaq fəaliyyətə başlayıb.

 

Eyni zamanda müxtəlif şirkətlərdə çalışan əcnəbilərin və yerli vətəndaşların məcburi əməyə cəlb edilməsi ilə bağlı daxil olan müraciətlərin araşdırılması zamanı şikayətlərin əsasən, əmək mübahisələri ilə əlaqədar olduğu müəyyən edilib. Görülən tədbirlərlə 27 nəfər Türkiyə və Azərbaycan vətəndaşına 3 şirkətin 77 min manat məbləğində pul ödəməsi təmin edilib.

 

Sənədə əsasən, son on ildə Azərbaycanda 580 insan alveri və məcburi əmək faktı aşkarlanaraq, 385 nəfər cinayət məsuliyyətinə cəlb edilib. Beş mütəşəkkil dəstə, 152 cinayətkar qrup zərərsizləşdirilib. İnsan alverinin qurbanı olan 529 şəxs cəmiyyətə reinteqrasiya olunub.