Türkiyənin 30-a yaxın universitetinin iştirakı ilə növbəti xüsusiləşmiş təhsil sərgisi təşkil olunub. Sərgidə tələbələrə xaricdə yüksək keyfiyyətli təhsil imkanı, yataqxanalar və digər məsələlər barədə ətraflı məlumat verilib. Sərgidə, həmçinin bu universitetlərdə pulsuz təhsil imkanları haqqında təqdimat və seminarlar da keçirilib.

Sərginin açılışında çıxış edən Türkiyənin Azərbaycandakı səfirliyinin təhsil müşaviri Durmuş Gökmen bildirib ki, belə sərgilərin keçirilməsi ölkələr arasında təhsil sahəsində əlaqələrin daha da genişləndirilməsi üçün çox əhəmiyyətlidir.

“Biz bu cür sərgilərin vacibliyinə inanırıq. Türkiyədə təhsil almaq istəyənlərin gənclərin sayının çox olması bizə məlumdur. Məhz buna görə, bu cür sərgilərin keçirilməsinə tərəfdarıq. Özünü dünya miqyasında təsdiq edən universitetlərimiz var. Bu səbəbdə azərbaycanlı gənclərin Türkiyə universitetlərini seçmələrini məsləhət bilərdim".

O, ölkələr arasında tələbə mübadiləsinin təhsilə müsbət təsir göstərdiyini bildirib. İki gün davam edəcək sərgiyə giriş pulsuzdur.