Masallıda 3 nəfərin yaralanması ilə nəticələnən ağır yol - nəqliyyat qəzası baş verib. APA TV-nin Cənub bürosunun məlumatına görə, hadisə Masallı-Yardımlı şose yolunda, rayonun Şıxlar kəndindən keçən hissəsində qeydə alınıb. Masallının Əzizabad kənd sakini, 24 yaşlı Aşurəli Cahangirovun idarə etdiyi “Volksfagen Passat” markalı avtomobil hərəkətdə olarkən qəfildən körpü üzərində idarəetməni itirərək, 25 metr hündürlükdən çaya aşıb. Nəticədə sürücü və avtomobildə sürücünün yaxın qohumları olan 24 yaşlı Ceyhun Cahangirov və 26 yaşlı Valid Cahangirov müxtəlif dərəcəli bədən xəsarətləri ilə Masallı Mərkəzi Rayon Xəstəxanasına yerləşdiriliblər. Hər üç yaralıya müvafiq tibbi yardım göstərilib.

 

Qəzanın hansı səbəbdən baş verməsi hələlik məlum deyil. İlkin ehtimala görə sürücü nəqliyyat vasitəsini yüksək sürətlə idarə edib. Qəzanın dəqiq təfərrüatları isə ekspertizanın rəyindən sonra bəlli olacaq.

Faktla bağlı Masallı Rayon Polis Şöbəsində araşdırma aparılır.