ABŞ Senatına qondarma “erməni soyqırımı”nın tanınmasına dair qanun layihəsi təqdim olunub. APA TV-nin məlumatına görə, layihənin müəllifləri Senatın xarici əlaqələr komitəsinin sədri, demokrat Robert Menendes və son günlər Türkiyəyə qarşı sərt çıxışları ilə gündəmdə olan respublikaçı senator Mark Kirkdir. Qanun layihəsinin təqdimatının Türkiyənin ABŞ-a yeni səfir təyin etdiyi dövrə təsadüf etməsi diqqət çəkir. Ankara səfir Namiq Tanın yerinə Sərdar Kılıçı səfir təyin etsə də, yeni səfir hələlik fəaliyyətə başlamayıb. Qanun layihəsinin aprelin 24-ə kimi qəbul olması gözlənilir. Layihənin müəllifi Robert Menendes bildirib ki, Senat soyqırımını tanımalı və 1915-ci ildə həlak olanların xatirəsini yad etməlidir. Yerli mətbuat Türkiyə-ABŞ münasibətlərində gərginliyin artması, Türkiyədə sosial şəbəkələrin fəaliyyətinə qadağa qoyulması və demokratların Senatda səs çoxluğuna sahib olması səbəbilə qanun layihəsinin qəbulu ehtimalının yüksək olduğunu yazır.