“Qərb İranı qarışdırmaq, orada yaşayan Azərbaycan türklərinin ayrılaraq dövlət qurması üçün məndən dəstək istədi”. Bu fikirləri APA-ya eksklüziv müsahibəsində Türkiyənin istefada olan jandarma generalı Vəli Küçük deyib.

APA-nın Türkiyə bürosundan Mayis Əlizadəyə açıqlamalar verən general Qərbin bu təklifinə qarşı çıxdığını bildirib. “Ancaq mən buna qarşı çıxdım, çünki bunun nə zamanı, nə də sırası idi. Qərb bunu İrandakı Azərbaycan türklərinə yaxşılıq etmək üçün istəmirdi, ertəsi gün gəlib Orta Şərqi qarışdırmaq, imperialistlərin bu torpaqları tamamilə ələ keçirməsi üçün istəyirdi. Bunlara qarşı çıxdığıma görə məni hədəfə götürdülər”.

Vəli Küçük qeyd edib ki 300 milyonluq Türk Dünyası bir araya gələ bilsə, dünyanın xəritəsi və mahiyyəti dəyişəcək: “Bundan qorxduqlarına görə Orta Şərqi qarışdırmaq istəyirlər. Məni 6 il həbsdə saxladılar, ancaq heç vaxt fikirlərimdən vaz keçməyəcəyəm. Yenə də eyni fikirləri təkrarlayacağam. Əgər ermənilər Azərbaycanın 17 min kvadrat kilometr torpağını işğal edibsə və mən buna qarşı səsimi çıxara bilmirəmsə, onda niyə yaşayıram? 1 milyon insan öz torpaqlarında qaçqındır. Bunun niyə baş verdiyini demək mənim günahımdırmı? Mən Azərbaycanın və bütün Türk Dünyasının nəfəriyəm, yenə də danışacağam, yenə də torpaqlarımızın işğaldan azad edilməsi üçün çalışacağam, yenə də bildiklərimi deyəcəyəm”.

Vəli Küçük “Ergenekon” işi ilə bağlı məhkəmədə hakimə Qarabağla bağlı dediyi sözləri təkrarlayıb: “Məhkəmədə hakimə dedim ki, yasaq qoysan da, burdan çıxan kimi Qarabağa gedəcəyəm. Təbii ki, Azərbaycana gedib vətənimi, dostlarımı görmək istəyirəm. Yasaq ləğv edilən kimi gedəcəyim ilk yer Azərbaycandır. Mən də Azərbaycan mənşəliyəm, ancaq hər şeydən əvvəl türkəm”.

Qeyd edək ki, “Ergenekon” işini araşdıran məhkəmənin qərarı ilə ömürlük həbsə məhkum edilmiş general Vəli Küçük haqqında qərar daha yuxarı instansiya tərəfindən ləğv edilib və o ötən ay azadlığa buraxılıb.