Misirin cənubundakı Asvan şəhərində iki tayfa arasında qanlı toqquşma baş verib. APA TV-nin məlumatına görə, toqquşma nəticəsində azı 23 nəfər ölüb, onlarla adam xəsarət alıb. İki tayfa arasında münaqişə cümə günündən başlayıb və dünən gün ərzində davam edib. Buna iki tayfanın nümayəndələrinin biri-birinin yaşayış evlərinin üzərinə və divarlara təhqiramiz ifadələr yazması səbəb olub. Odlu və soyuq silahlardan da istifadə olunduğu toqquşmanı yerli polis təxminən bir sutka sakitləşdirə bilməyib. Əl-Həlayil və əd-Dabudiyə tayfaları arasındakı düşmənliyin tarixi uzaq keçmişə gedib çıxır. Misirin patriarxal həyat tərzinin hökm sürdüyü bir sıra cənub əyalətlərində namus məsələlərinə çox ciddi yanaşılır. Tayfanın hansısa üzvünə ünvanlanan təhqir bütün ailənin təhqir olunması kimi qəbul edilir və qanla yuyulur. Adətən, tayfalar arasında münaqişələr illərlə davam edir və onlarla adamın ölümü ilə nəticələnir.