Polşanın baş naziri Donald Tusk Şimali Atlantika blokunun ölkəsinin ərazisində hərbi bazalarını artıracağını bildirib. APA TV-nin məlumatına görə, hökumət rəhbəri bu addımın Rusiyanın Krıma əl qoymasından sonra digər Şərqi Avropa ölkələrinin təhlükəsizliyi üçün atıldığını açıqlayıb. NATO isə bu bəyanata qədər artıq fəaliyyətə keçib və hərbi qüvvələrə adı çəkilən region dövlətlərinin müdafiəsi məqsədilə bölgəyə yerləşmələri barədə əmr verilib. "NATO qüvvələrinin Polşada möhkəmlənmək planı artıq reallaşıb və bunun nəticələri yaxın müddətdə bilinəcək. Hazırda biz nə baş verəcəyi haqqında müzakirələr aparmırıq, mənim üçün region ölkələri ilə birlikdə öz vətənimin də təhlükəsizliyi vacibdir. Bu işləri operativ olaraq həyata keçirmək lazımdır və indi biz bu işlərin texniki tərəfləri barədə danışıqlar aparırıq". Bu barədə Tusk Polşanın TVN kanalına danışıb. Bir müddət əvvəl isə Almaniya kansleri bəyan edib ki, Avropanın Rusiyaya qarşı sərt sanksiyalar tətbiq edəcəyinə kimsə şübhə duymasın. Kansler bildirib ki, sanksiyalar gələcəkdə Kremli Ukraynanın şərq vilayətlərində də stabilliyi pozma planlarından daşındıracaq. "Əgər Ukraynanın ərazi bütövlüyünə növbəti dəfə təhlükə yaranarsa biz iqtisadi sanksiyalara da əl atacağıq. Bu məsələdə bəxtimiz onda gətirdi ki, Avropa ölkələrinin bir olduğunu gördük və biz bütün bu planlarımızı birlikdə həyata keçirəcəyik" deyə Merkel vurğulayıb. Xatırladaq ki, ABŞ-ın müdafiə naziri Çak Xeyql də bir neçə gün öncə Pentaqon qüvvələrinin əlavə 5 briqadasının Avropada yerləşdirilməsinin mümkünlüyünü müzakirə etdiklərini deyib. O, bunu Rusiya hərbçilərinin Ukrayna sərhədlərində cəmləşdirilməsi ilə əlaqələndirib.