Mərkəzi Amerika ölkələrində ilk dəfə metro xidmət göstərməyə başlayıb. Bu ölkə Panamadır. İlk metro xəttinin tənətənəli açılış mərasimi də keçirilib. Ölkə prezidenti Rikardo Martinelli tədbirdə iştirak edib. İlkin çəkilən xəttin uzunluğu 14 kilometrdir və 13 stansiya üzərində qurulub. Ölkə prezidenti özü metronun üstünlükləri barədə məlumat verib. Bildirib ki, əgər əvvəl bu istiqamətdə insanlar 2 saat vaxt sərf edirdilərsə, indi bu yolla cəmi 23 dəqiqəyə gediləcək. Metropolitenin tikintisi rekord sayılacaq müddətə - 2 il 2 aya başa gəlib. Dövlət büdcəsindən bu işə 1,8 milyard dollar vəsait xərclənib. Metro vaqonlarında və keçidlərdə maksimum təhlükəsizlik qaydaları təmin edilib, qatarlar isə Fransa istehsalıdır. Bu arada ölkənin ticarət və sənaye naziri metroda gediş haqqını da açıqlayıb - 1 dollar. Amma ilk bir ayda metro pulsuz xidmət göstərəcək. Qəribəsi budur ki, dövlətin bu addımını müxalifət düzgün saymır. Məsələ ondadır ki, Panama şəhərlərinə 1 ay sonra mer seçkiləri keçirələcək və bu müxalifət tərəfindən dövlət büdcəsi hesabına seçki təbliğatı kimi qiymətləndirilir.