Aprelin 3-də ABŞ Dövlət Departamenti katibinin müavini Vendi Şermanın Krım tatarları icmasının lideri Mustafa Cemiloğlu ilə görüşdüyü məlum olub. Bu barədə keçirdiyi brifinqdə Dövlət Departamentinin rəsmi nümayəndəsi Meri Harf məlumat verib. Onun sözlərinə görə, görüş zamanı Şerman ABŞ-ın Ukraynanın suverenliyini və ərazi bütövlüyünü hər zaman dəstəkləyəcəyini, o cümlədən Krım tatarları da daxil olmaqla Ukraynada insan haqlarını müdafiə edəcəyini bəyan edib.   Dövlət Departamentinin müavini vurğulayıb ki, ölkəsi  Rusiyanın Krımı özünə birləşdirmək cəhdini heç zaman tanımayacaq. "Cənab Cemiloğlu özünün dediyi kimi Rusiya vətəndaşı olmaq və ya işləmək, təhsil almaq, səs vermək hüququnu itirmək arasında seçim etmək məcburiyyətində qalan Krım tatarlarına göstərdiyi dəstəyə görə rəsmi Vaşinqtona  təşəkkür edib. O, bundan sonra da beynəlxalq ictimaiyyəti Krımdakı vəziyyətə diqqətlə yanaşmağa çağırıb" deyən Meri Harf ABŞ-ın bundan sonra da Ukraynadakı hazırkı hökumətə dəstəyini davam etdirəcəyini bildirib.