Türkiyə futbol çempionatının Azərbaycanda da maraqla gözlənilən və dünyanın ən böyük derbilərindən hesab olunan "Qalatasaray" və "Fənərbaxça" görüşü bu gün axşam saatlarında oynanılacaq. Əzəli rəqiblərin görüşü həm də turnir baxımından böyük əhəmiyyət kəsb edir. Hazırda “Fənərbaxça” çempionatın bitməsinə bir neçə tur qalmış “Qalatasaray” və “Beşiktaş”ı 10 xal qabaqlasa da, nəzəri cəhətdən çempionluq yarışını uduza bilər. Çünki bir neçə tur əvvəl keçirilən və yarımçıq dayandırılan "Trabzonspor"-"Fənərbaxça" görüşünün nəticəsi hələ açıqlanmayıb. "Qalatasaray"ın sahəsində keçiriləcək görüşdə komandaların meydana çıxacağı formalar nümayiş etdirilib. Hər iki komanda klassik formada sahəyə çıxacaq. Bu arada "Qalatasaray"ın Floryadan ayrılma görüntüləri yayımlanıb. "Fənərbaxça" tərəfdarı da komandasını Samandradan yola salıb. Fənərlilər klublarını məşəllərlə Türk Telekom Arenaya qədər müşayiət edəcəklər. Polis yol boyu onlara nəzarət edəcək. "Qalatasaray" tərəfdarı isə baş məşqçi Mançini üçün sürpriz ediblər. Onlar stadionda "Mançini, narahat olma, Roma bir gündə qurulmadı!" yazı olan pankart açacaqlar.