Cəlilabad rayonunun Göytəpə şəhərində yerləşən bu kilsənin tarixi XIX əsrin ortalarına gedib çıxır. Türkmənçay müqaviləsindən sonra Cəlilabad rayonuna köçürülmüş xristian inanclı ruslar ibadət etməkdən ötrü burada əvvəlcə kiçik bir bina tikiblər. Amma həmin tikili rusların kütləvi ibadətləri üçün darısqal olduğundan cənub bölgəsində bu kilsənin inşa edilməsi qərara alınıb.

 

İnşasına 1848-ci ildə başlanan kilsə düz 4 ildən sonra – 1852-ci ildə istifadəyə verilib. 6 günbəzdən ibarət olan bu qədim memarlıq abidəsinin tikinti işləri əsasən yerli memarlar tərəfindən aparılıb. Məhz elə buna görə kilsənin pəncərə və divarlarında Azərbaycanın milli memarlıq üslubunun çalarları açıq-aşkar nəzərə çarpır. Diqqəti cəlb edən daha bir maraqlı xüsusiyyət ondadır ki, kilsənin çöl divarları hər tərəfdən özündə xaç şəklini əks etdirir.

 

Ötən əsrin 30-cu illərində Sovet İttifaqı Kommunist Partiyasının ateizim ideologiyası bir sıra dini abidələrlə yanaşı, Göytəpə şəhərindəki bu kilsənin də üzərindən qara yellərin əsməsinə səbəb olub. Nəticədə insanlara öz dini mərasimlərini yerinə yetirmək qadağan edildiyindən, bu əzəmətli memarlıq abidəsinin qapıları birmənalı şəkildə onların üzünə bağlanıb.

 

1990-cı illərin əvvəllərində Cəlilabad rayonunda yaşayan rusların əksər hissəsinin öz qədim dədə-baba torpaqlarına köçməsi və Göytəpədəki kilsənin dindarlar tərəfindən  istifadə olunmaması səbəbindən bu tarixi abidə Mədəniyyət və Turizm Nazirliyinin sərəncamına verilib.

 

Tarixçi Ənvər Əliyev APA TV-yə deyib ki, Azərbaycan ərazisində ən qədim və ən böyük kilsələrdən biridir. İndiyə kimi də, bizim Azərbaycan xalqı bunu qoruyub saxlayıb. Amma slavyanlar bizim abidələrimizi dağıdıb, söküb, xaraba qoyurlar.

 

Yerli əhəmiyyətli abidə kimi rəsmi qeydiyyata alınan kilsənin birinci mərtəbəsində  hazırda Göytəpə şəhər mədəniyyət evi yerləşdirilib. Təqdirəlayiq haldır ki, mədəniyyət işçiləri tərəfindən bu tarixi abidə daim nəzarətdə olmaqla göz bəbəyi kimi qorunur.

 

Bununla belə, tikildiyi vaxtdan cəmi bir dəfə cari təmir olunan Göytəpə kilsəsinin əsaslı bərpaya ehtiyacı var.