Bakıda Mərkəzi Asiya İnkişaf Bankının Mərkəzi Asiya Regional İqtisadi Əməkdaşlıq (CAREC) proqramı çərçivəsində Gömrük Əməkdaşlıq Komitəsinin texniki yardım üzrə birinci seminarı təşkil olunub. APA TV-nin xəbərinə görə, seminarda çıxış edən Azərbaycan Dövlət Gömrük Komitəsinin sədri Aydın Əliyev bildirib ki, tədbirin təşkil olunmasında məqsəd regional gömrük əməkdaşlığı sahəsində planın tərtib olunması və CAREC ölkələrinin gömrük kadrların peşəkarlığının artırılması və hazırlanmasıdır: "Gömrük kadrlarının hazırlanması və peşəkarlarının artırlması vacib və mühüm məsələdir. Ümumiyyətlə müasir qloballaşan dünyada uğurlu nailiyyətlər və güclü iqtisadiyyata malik olmaq üçün bir sıra sahələrlə yanaşı, gömrük infrastrukturunun beynəlxalq standartlara uyğun olaraq, inkişaf etdirilməsi zəruri məsələlərdəndir".

 

Asiya İnkişaf Bankının Azərbaycandakı Daimi Nümayəndələyinin rəhbəri Olli Noroyono isə bildirib ki, Azərbaycan beynəlxalq miqyasda gömrük əməkdaşlığının genişləndirilməsi və inkişaf etdirilməsi istiqamətində uğurlu addımlar atıb. CAREC-in fəaliyyətindəki tərəqqidən razı olduğunu deyən Olli Noroyono deyib ki, seminar ölkələr arasında əməkdaşlığı daha da gücləndirəcək və hiss olunan nəticələrə gətirib çıxaracaq.

 

Yaponiyanın Azərbaycandakı səfiri vurğulayıb ki, CAREC ölkələrinin böyük ticarət potensialı mövcuddur. Bu ölkələr arasındas ticarət əlaqələrinin genişlənməsi, gömrük sahəsində də əməkdaşlığın inkişaf etdirilmasini zəruri edir. 11 ölkədən olan nümayəndələrin iştirak etdiyi beynəlxalq seminar 3 gün davam edəcək.