Azərbaycan Milli Elmlər Akademiyasının Mərkəzi Nəbatat Bağı ərazisində ağacların kəsilməsi narahatlığa səbəb olub. Çəkiliş qrupumuz həmin ərazidə olub. Ərazidə ağacların kəsilmədiyi, kökündən çıxarıldığı məlum olub. Ağaclar çıxarılandan sonra yerləri şumlanmışdı.

 

Nəbatat Bağının mətbuat xidmətindən APA TV-yə deyiblər ki, ağacların kəsilərək daşınması və tikinti işlərinin aparılacağı barədə deyilənlərin heç bir əsası yoxdur. Yalnız yenidənqurma məqsədilə Mərkəzi Nəbatat Bağındakı ağacların bir qismi bağın digər hissələrinə köçürülüb və artıq əkilib. Ağacların köçürüldüyü ərazinin sahəsi yarım hektardan çox deyil. Həmin ərazidəki bitkilər kəsilərək bağdan çıxarılmayıb. Orada tədqiqat aparılacaq.

 

Bağda yeni əkilən ağaclara və bitki becərənlərə də rast gəlmək mümkündür. Həmin şəxslər də bildiriblər ki, bu yerdəyişmələr mövsümi xarakter daşıyır. Bildirilib ki, ərazidəki ağacların bağın başqa hissələrinə köçürülməsi həm də həmin hissədə yerin altından kommunikasiya xətlərinin keçməsi və elektrik naqillərinin olması ilə bağlıdır. Həmin ərazidəki ağaclar böyük olduğundan kommunikasiya xətləri onların köklərinin inkişafına mane olub:  "Orada kökləri daha dərin olmayan bitkilərin əkilməsi nəzərdə tutulur. Ağacların kökləri böyük olduğundan onları əl ilə çıxarmaq mümkün olmazdı. Ona görə də ağacları traktor çıxarıb. Ağaclara müəyyən zədələr dəysə də, bu, o qədər də qorxulu olmayıb".

 

Bağın sahəsi 50 hektara yaxındır. Nəbatat bağında 2000-dən artıq ağac, kol, çiçək və ot bitkilərinin kolleksiyası toplanıb.

 

Hazırda bağda Qafqaz florasından olan 125 növ nadir və nəslikəsilməkdə olan və adları keçmiş SSRİ-nin və Azərbaycanın "Qırmızı Kitab"larına daxil edilmiş bitki kolleksiyası var.