Rusiya paytaxtında baş verən atışma zamanı polis kapitanını öldürən azərbaycanlının şəxsiyyəti müəyyən olunub. APA TV-nin Moskva müxbirinin verdiyi məlumata görə, 31 yaşlı polis kapitanı Sergey Jadobkini odlu silahla qətlə yetirən milliyyətcə azərbaycanlı, 1966-cı il təvəllüdlü Rusiya vətəndaşı Xəlil Sarıyev olub.

 

Hadisədən sonra qətli törədən Xəlil Sarıyev özünü ayağından yaralayıb. Onun üzərindən "Sayqa" markalı odlu silah götürülüb.

 

Həmin dəstənin Moskvada çoxlu sayda cinayət törətdiyi bildirilib. Bir ay əvvəl Moskva vilayətində həmin dəstənin üzvləri iş adamının evini qarət edərək, ev sahibini bıçaqla qətlə yetiriblər.

 

MDB ölkələri üzrə Mütəşəkkil Cinayətkarlığa Qarşı Mübarizə Bürosunun direktor müavini, polis polkovniki Əkbər Yusifov APA-nın Moskva müxbirinə açıqlamasında dəstə üzvlərindən ikisinin Azərbaycan vətəndaşı olduğunu bildirib: "Qətli törədən Xəlil Mirzə oğlu Sarıyev Azərbaycanda doğulsa da, Rusiya vətəndaşı olub. Digər iki nəfər isə Azərbaycan vətəndaşıdır. Onlar Sumqayıt şəhər sakini, 1984-cü il təvəllüdlü Əliyev Ramin Vidadi oğlu, Kürdəmir rayon sakini, 1975-ci il təvəllüdlü Xəlilov Hüseyn Xalid oğludur. Dəstə üzvlərindən olan bir nəfər qadın isə 1991-ci il təvəllüdlü Belarus vətəndaşıdır".

 

Faktla bağlı Rusiya İstintaq Komitəsi tərəfindən Rusiya Federasiyası Cinayət Məcəlləsinin hüquq-mühafizə orqanı əməkdaşının həyatına qəsd maddəsi ilə cinayət işi açılıb, araşdırma aparılır.