Donetsk Vilayət Şurasının deputatları ölkədə yeni yaradılan hökumətin tərkibindən çıxmaq və Donetsk Xalq Respublikasının bəyan edilməsi barədə deklarasiya qəbul ediblər. Deklarasiya Donetsk vilayət şurasının növbədənkənar toplantısında yekdilliklə qəbul olunub. Toplantı zamanı həmçinin yeni yaradılmış “respublika”nın Rusiya Federasiyasına qəbulu və Rusiya prezidenti Vladimir Putinə vilayətə müvəqqəti sülhməramlı kontingentin göndərilməsi ilə bağlı müraciət edilib.

Donetsk əyalətinin nümayiş keçirən əhalisi respublikanın yaradılmasından sonra referendum keçirilməsini və daha sonra Rusiyanın tərkibinə birləşmək niyyətlərini açıqlayıblar.

Bundan əlavə Donetskdə naməlum şəxslər vilayətin dövlət teleradio şirkətini də ələ keçirməyə cəhd ediblər. Şirkətin girişinə avtomobillə gələn adamlar avtomat silahdan atəş də açıblar. Milis xüsusi dəstəsinin müdaxiləsindən sonra atəş açanlar ərazidən uzaqlaşıblar.