Azərbaycan Müəllimlər İnstitutunun Gəncə filialının və Kəlbəcər rayon Təhsil şöbəsinin vəzifəli şəxslərinin qanunsuz hərəkətləri barədə Baş prokuror yanında Korrupsiyaya qarşı Mübarizə İdarəsində başlanmış cinayət işi üzrə istintaq davam etdirilir. Baş Prokurorluğun mətbuat xidmətindən APA TV-yə verilən məlumata görə, aparılmış istintaqla Kəlbəcər rayon təhsil şöbəsinin müdiri Məhəmməd Bağırov qulluq səlahiyyətlərindən sui-istifadə edərək, 30-dan artıq şəxsi saxta diplomlarla ayrı-ayrı ümumtəhsil məktəblərinə işə qəbul etməkdə şübhəli bilinib. O, Cinayət Məcəlləsinin 308.2-ci (vəzifə səlahiyyətlərindən sui-istifadə etmə)` maddəsi ilə istintaqa cəlb olunub. Hazırda cinayət işi üzrə rayon təhsil şöbəsinin vəzifəli şəxsləri tərəfindən törədilməsi ehtimal olunan digər cinayətlərin aşkar edilməsi istiqamətində zəruri istintaq-əməliyyat tədbirləri davam etdirilir.