Azərbaycan prezidenti Naxçıvana səfər edib

Azərbaycan prezidenti İlham Əliyevin Naxçıvan Muxtar Respublikasında səfərdədir. Naxçıvan Beynəlxalq Hava Limanında dövlət başçısını Ali Məclisin sədri Vasif Talıbov və digər rəsmi şəxslər qarşılayıblar.

 

Naxçıvan Muxtar Respublikasının rəhbər şəxsləri ilə görüşən prezident İlham Əliyev səfər çərçivəsində Naxçıvan Beynəlxalq Hava Limanının yeni inzibati binasının açılışında iştirak edib. Dövlət başçısı Naxçıvan Beynəlxalq Hava Limanının nəqliyyat infrastrukturunun möhkəmləndirilməsi ilə bağlı həyata keçirilən ardıcıl tədbirlər çərçivəsində aeroportun fəaliyyətini daha da müasirləşdirmək və təhlükəsizliyi artırmaq məqsədilə alınan müxtəlif təyinatlı yeni maşın-mexanizmlərə baxıb.

 

Naxçıvan Muxtar Respublikası Ali Məclisinin sədri Vasif Talıbov və “Azərbaycan Hava Yolları” Qapalı Səhmdar Cəmiyyətinin prezidenti Cahangir Əsgərov prezidentə məlumat veriblər ki, inşasına ötən ilin martında başlanılan bina ən müasir səviyyədə tikilib.

 

Diqqətə çatdırılıb ki, aerovağzal binasının yenidən qurulması və bərpasından sonra aeroportun sərnişin dövriyyəsi saatda 450-500 nəfərə çatacaq. Bu isə blokada şəraitində olan Naxçıvan hava limanının strateji yükünü daha artıracaq.

 

Səfər çərçivəsində dövlət başçısı, həmçinin Heydər Əliyevin Naxçıvan şəhərinin mərkəzində ucaldılan abidəsini ziyarət edərək önünə gül dəstəsi qoyub.

 

Daha sonra prezident Azərbaycan prezidenti Biznes Mərkəzində Muxtar Respublikada istehsal edilən məhsulların sərgisi ilə tanış olub. Ali Məclisin sədri Vasif Talıbov dövlət başçısına məlumat verib ki, muxtar respublikada hazırda 346 növ və 988 çeşiddə məhsul istehsal olunur. Yeni yaradılan müəssisələr əhalinin 106 növ ərzaq və 226 növ qeyri-ərzaq məhsullarına olan tələbatını tamamilə yerli istehsal hesabına ödəmək imkanına malikdir.

 

Prezident İlham Əliyev Naxçıvan avtomobil zavodunda istehsal olunan avtomaşınlara da baxıb. Hazırda 62 nəfərin işlədiyi müəssisədə 9 müxtəlif modifikasiyada avtomobil istehsal olunur.

 

Diqqətə çatdırılıb ki, son 10 ildə 954 istehsal və xidmət müəssisəsi yaradılıb. 2003-2013-cü illərdə 58 min 460 yeni iş yeri açılıb, bununla da işsizliyin səviyyəsi sıfıra enib.

 

Prezident eyni zamanda yeni yaradılan “Naxçıvanqala” Tarix-Memarlıq Muzey Kompleksi ilə tanış olub. Daha sonra “N” saylı hərbi hissədə Muxtar Respublikanın hərbi hissələrinə daxil olan yeni texnika və silahlara baxıb.  Səfər çərçivəsində ölkə başçısı Gənclər Mərkəzinin və Hərbi prokurorluğunun yeni inzibati binasının açılışında iştirak edib.

Müəllif | Apa.Tv
Apa.tv