APA TV-nin xəbərinə görə, qurumun yaz sessiyasının ilk günü sədr, xanım Ann Brassör keçirdiyi mətbuat konfransında belə deyib. “Bilirsiniz, burada ələ düşən hər fürsətdə dialoq aparmaq lazımdır. Gərək, bir-birinə qarşı ittihamlar irəli sürməyəsən, bir yerdə oturub danışmaq lazımdır. Bunun üçün mən də məndən öncəki sədrlər kimi bu ənənəyə sadiq qalaraq, hər iki ölkənin nümayəndə heyətləri arasında bu dialoqu davam etdirməyə çalışacağam. Nümayəndə heyətləri rəhbərlərinin hər ikisini öz otağıma dəvət edib, onlarla birgə bu haqda fikir mübadiləsi aparmaq niyyətindəyəm. Çox təəssüf ki, ötən sessiyada onlarla ayrı-ayrılıqda görüşdüm, bir araya gəlmədilər. Bundan sonra çalışacağam ki, birgə görüşlərin keçirilməsinə nail olum. Çünki bu dialoqu daha da gücləndirmək lasımdır. Bu sessiya ərzində yenidən cəhd edəcəyəm ki, nümayəndə heyətlərinin rəhbərlərini birgə dəvət edim. Çalışacağam ki, onlar arasında ümumi anlaşma mühitini yaradım. Biz müəyyənləşdirməliyik ki, gələcəkdə müzakirələri davam etdirmək üçün hansı addımları ata bilərik”, - deyə xanım sədr qeyd edib.

Azərbaycanın Avropa Şurası Nazirlər Komitəsindəki sədrliyi ilə bağlı suala cavab verən xanım Brassör bu sədrliyin həm Azərbaycan, həm də Avropa Şurası üçün olduqca vacib olduğunu bildirib: “Bu sədrlik eyni dərəcədə Azərbaycan üçün və təşkilatımız üçün o qədər də asan keçməyəcək. Çünki ortada aydınlıq gətirməmizə ehtiyac olan bir çox məsələlər var. Mən assambleyadakı ənənəmizə sadiq qalaraq, Azərbaycanın Avropa Şurasındakı sədrliyi zamanı keçirəcəyimiz ilk sessiyamıza Azərbaycan Respublikasının prezidenti İlham Əliyevi dəvət etmişəm. Azərbaycan prezidenti də öz növbəsində bu dəvətimizi qəbul edib. AŞPA-nın iyun ayında keçiriləcək növbəti yay sessiyasında İlham Əliyevin assambleya qarşısında çıxışı gözlənilir”.

 

Mətbuat konfransı zamanı xanım Ann Brassör  Assambleyanın yaz sessiyasının gündəliyi və müzakirə olunacaq əsas məsələlər haqda ətraflı məlumat verib.