Lənkəranda piyadanın vurulması ilə nəticələnən yol-nəqliyyat qəzası baş verib. APA TV-nin cənub bürosunun məlumatına görə, hadisə şəhərin bazarətrafı ərazisində, avtomobillərin sıx hərətkət etdiyi Həzi Aslanov küçəsində qeydə alınıb. Lənkəran şəhər sakini, 35 yaşlı Gülarə Hacırza qızı Feyzullayevanı həmin yerdə maşın vurub. Piyadanı vuran avtomobilin sürücüsü yaralını xəstəxanaya aparmaq əvəzinə hadisə yerindən qaçıb. Müxtəlif dərəcəli bədən xəsarətləri alan və huşunu itirən yaralıya hadisə şahidləri kömək etsələr də, onun vəziyyəti ağır olduğundan özünə gəlməyib. Gülarə Feyzullayeva ətrafdakı avtomobillərdən biri ilə Lənkəran Mərkəzi Rayon Xəstəxanasına (MRX) çatdırılıb.

 

Xəstəxanadan verilən məlumata görə, yaralı travmatologiya şöbəsinə yerləşirilib və hazırda vəziyyətinin normal olduğu bildirilir.

 

Hadisə yerinə polis şöbəsinin  əməkdaşları cəlb olunsa da, olayın dəqiq səbəbləri məlum olmayıb.

 

Hadisə ilə başqa versiya da var. Belə ki, Gülarə Feyzullayevanın marşrut avtobusunda sürücü ilə mübahisə edərək özünü yerə atdığı da etimal olunur.

 

Hadisənin dəqiq səbəbləri araşdırmalardan sonra məlum olacaq.