Cənubi Koreya sahilləri yaxınlığında “Sevol” sərnişin bərəsinin batması nəticəsində 300-ə yaxın adam itkin düşüb. APA-nın “Renhap” agentliyinə istinadən verdiyi məlumata görə, hadisə baş verən an bərədə 477 nəfər olub. Sərnişinlərin çoxunun şagird və müəllim olduğu bildirilir. İki nəfərin öldüyü rəsmən təsdiqlənib. Beş saat ərzində yalnız 180 nəfəri xilas etmək mümkün olub. Hazırda hadisə yerində əməliyyat keçirilir. Əməliyyatda 24 hərbi gəmi, habelə 18 helikopter iştirak edir. Gəminin batmasının səbəbi hələlik məlum deyil. Bərə Jeju adasına getmək üçün yola çıxıb.