Cəlilabaddda yanğın hadisəsi baş verib. APA TV-nin cənub bürosunun məlumatına görə, hadisə  rayonun Çünəxanlı kənd sakini, 1934-cü il təvəllüdlü Yavər İsmi oğlu Ağayevə məxsus ikimərtəbəli, 6 otaqlı fərdi yaşayış  evində qeydə alınıb. Evdə  tənha yaşayan 80 yaşlı Yavər Ağayev çətinliklə də olsa  özünü güclü alovun cəngindən xilas edə bilib. Daha sonra isə  evin içərisindəki kiçik tutumlu qaz balonları partlayıb, bu isə yanğının daha da şiddətlənməsinə səbəb olub.

 

Hadisə yerinə təcili olaraq Fövqəladə Hallar Nazirliyinin Cəlilabad Rayon Yanğından Mühafizə Hissəsinin 2 yanğınsöndürən maşını və canlı qüvvəsi cəlb olunub. Yanğın nəticəsində ümumi sahəsi 320 kvadratmetr olan ev içindəki məişət əşyaları ilə birlikdə  tamamilə yanaraq külə dönüb. Yanğının dəqiq başvermə səbəbləri aparılan ekspertizanın nəticələrindən sonra məlum olacaq.

 

Hazırda  faktla bağlı araşdırma aparılır.