Ukraynanın hökumət qoşunlarının hücuma keçdiyi Slavyansk şəhəri yaxınlığındakı Semyonovka qəsəbəsində yaşayan Ahıska türkləri atışmadan ziyan görən evlərini təmir etməyə başlayıblar.

 

Slavyansk şəhərinə yaxınlaşan hökumət qüvvələri ilə separatçılar arasında Semyonovka qəsəbəsində baş verən silahlı toqquşma zamanı Ahıska türklərinə məxsus evlərə də ziyan dəyib. Güllələrin dəyməsi nəticəsində çoxlu sayda evin pəncərə şüşələri sınıb, bir evdə yanğın başlayıb. Yerli əhalinin mal-qarası da tələf olub.

 

Şahidlər atışmada avtomat silahlardan və hərbi maşınlardan istifadə edildiyini bildiriblər. Məlumata görə, naməlum silahlı qrup isə evləri gülləbaran edib.

 

Ahıska türklərinin "Vətən" cəmiyyətinin Donetsk təmsilçisi Nəbican Basatov bildirib ki, Slavyanskdakı türklər əkinçiliklə məşğul olurlar. Onun sözlərinə görə, Ahıska türkləri gələcəklərindən narahatdırlar.