Azərbaycan Hərbi Dəniz Qüvvələrində aşkarlanmış qanun pozuntuları ilə bağlı daha iki hərbçi həbs edilib. Bakı Hərbi Məhkəməsindən APA-ya verilən məlumata görə, HDQ-nin Yanacaq Xidmətinin rəisi, polkovnik-leytenant Kazım Əsgərov və yanacaqdoldurma məntəqəsinin rəisi, baş miçman Kamandar Paşayev Respublika Hərbi Prokurorluğunun təqdimatı əsasında Cinayət Məcəlləsinin 179.3.2-ci maddəsi ilə təqsirləndirilən şəxs qismində cəlb edilməklə barələrində 3 ay müddətinə həbs-qətimkan tədbiri seçilib. Xatırladaq ki, Respublika Hərbi Prokurorluğu bir müddət əvvəl HDQ-də yoxlamalar aparıb və orada qanun pozuntuları aşkarlanıb. Qanun pozuntuları ilə bağlı cinayət işi başlanıb və qanunazidd əməlləri törətməkdə təqsirli bilinən bir neçə nəfər, həmçinin HDQ-nin sabiq komandanı, vitse-admiral Şahin Sultanov təqsirləndirilən şəxs qismində cəlb edilməklə barələrində həbs qətimkan tədbiri seçilib. Şahin Sultanov Cinayət Məcəlləsinin 313-cü və 179.3.2-ci maddələri ilə təqsirli bilinir.