"2007-2015-ci illər üzrə Azərbaycan gənclərinin xaricdə təhsili üzrə Dövlət Proqramı" çərçivəsində 2014-2015-ci tədris ili üzrə xarici ölkələrin ali təhsil müəssisələrində təhsil almaq istəyən gənclər üçün sənəd qəbulu başlayır. APA TV-nin xəbərinə görə, Təhsil Nazirliyinin informasiya şöbəsinin müdir müavini, QHT və KİV-lərlə iş sektorunun müdiri Cəsarət Valehov deyib ki, xarici ölkələrdə təhsil almaq üçün sənəd qəbulu mayın 20-dən avqustun 8-dək elektron qaydada aparılacaq. Müsabiqədə iştirak edənlər elektron qaydada təqdim etdikləri sənədlərin əslini də Təhsil Nazirliyinə təqdim etməli olacaqlar: "Dövlət Proqramının təqaüdçüləri  bakalavriat səviyyəsi üzrə təhsil almaq üçün 29, magistratura, doktorantura və rezidentura səviyyəsi üzrə isə 35 yaşadək olan Azərbaycan vətəndaşları sırasından seçilirlər. Şəffaflığı təmin etmək məqsədilə xaricdə təhsil almaq iddiaçıların müsabiqəsində bu ildən başlayaraq, audio-video çəkiliş aparılacaq. Bununla da prosesin hansı qaydada şəffaf aparıldığı audio-video çəkilişlərlə təsdiq olunacaq".

 

Nazirlik rəsmisi rezidentura səviyyəsi üzrə bu ildən mövcud olacaq bəzi yenilikləri də açıqlayıb. Azərbaycanda tibb təhsili alan gənclərin çoxunun Almaniyada rezidentura təhsili almaq istədiyini deyən Cəsarət  Valehovun sözlərinə görə, Almaniyada səhiyyə sahəsində qanunvericilikdə müəyyən dəyişikliklər olub. Belə ki, rezidentura səviyyəsi üzrə təhsil almaq üçün yalnız Almaniyada aprobasiya imtahanını müvəffəqiyyətlə vermiş, universitet klinikalarında işçi müqaviləsi imzalamış tələbələrin sənədləri qəbul ediləcək.